هبه صلاح

عبر المدير الفني لجمهورية شبين عصام شعبان عن غضبه من الهجوم الشديد الذي طاله هو وفريقه عقب الخساره امام الهلال المطروحي بهدفين لهدف في افتتاحية مشواره بالقسم الثاني مجموعة بحري عبر منشور على الحساب الخاص به علي موقع التواصل الاجتماعي فيسبوك.

وجاء المنشور حاملا بعض عبارات الاستياء والغضب والاستنكار كالتالي
“الاخوه الافاضل
مكنتش ناوى اتكلم ولا اكتب عن اى حاجه بخصوص مباراة امبارح لانى متعودتش ع كده سواء كسبان او خسران لان دى كوره وكل حاجه وارده ومتغيرة
رغم انى استغربت جدااا من كمية الشماتة والغل ف قلوب ناس الواحد بيتعامل معاها بكل ذوق واحترام وللاسف منهم ناس محسوبة ع النادى اكل عيشهم من النادى لدرجة انى قلت يمكن تكون مباراة الهلال دى كانت اخر مباراة ف الدورى والفريق هبط لاسمح الله
او كانت ف ملعبنا وخسرنا خسارة كبيره مثلا او كانت بعد عاشر مباراة والفريق جمع نقطه واحده زى ماكان بيحصل بس كان وقتها الناس بتدعم وتساند
ايه الحكاية يارجاله ابتدتوها بدرى ليه
وبدرى اوووى كمان طب اصبروا شويه
ماتخافوش الفرقه مش هتنزل تالته تانى انشاء الله
وناس تاعبه نفسها وعاملة جروبات تشتم ف الفريق ليه؟؟
هو ايه اللي حصل ؟ وبأمارة ايه؟ ومحدش يقولى نادى الجمهورية تاريخ والكلام الكبير ده لانى انا اخر واحد يتقال له الكلمه دى وأول واحد عارف قيمة وتاريخ النادى لأنى مسمعتش عنه ولا اتفرجت عليه
انا عشته وصنعته ولو بجزء بسيط واتغربت وعرفت قيمة اللى صنعته فاعتقد أنى من أحرص الناس ع التاريخ ده
أرجع واقول ان اللى استفزنى أنى اكتب وعارف انه غلط
كمية الاحترام والتقدير والخير اللى موجود ف ناس واصدقاء كتييير بيدعمونى وبيدعموا الفريق بس بقلب وبإخلاص ونيه صافية وانا بنحنى لكل واحد فيهم وابوس ع رأسه وأشكره ع مشاعره ونضافة قلبه
ياجماعة الخير عاوز اختم بحاجتين مهمين
اولا انا مقدر مشاعر المحبين وجمهور النادى المحترم وزعله ورغبتهم ف رؤية ناديهم ف احسن مكان
ثانيا انا شخص مليش ف السبووووووبه لا مع لاعب
ولاموظف ف النادى ولا جمهور ولا مدرب الحنفيه اتقفلت لحد ماامشى من النادى لان دى امانه
اخيرا العمل ف نادى الجمهورية شرف كبيييير جدا
بس فى حاجات أهم بكتير
الف الف شكر لكل المخلصين بجد واللى بيحبوا النادى والبلد بجد
وانشاء الله كلى ثقه ف ربنا واللعيبة الرجاله ومساعدة مجلس الادارة المحترم والجمهور الوفى ف وضع النادى ف مكانة محترمه
بيا او من غيرى”

وكان جمهورية شبين قد صعد مؤخرا من القسم الثالث من المجموعة العاشره التي كانت تضم فرق الشرقيه والمنوفية وظل طيلة الدوري يغرد منفردا بصدارة جدول الترتيب بعيدا عن أقرب منافسيه وكان من المقرر أن يخوض لقاءاته بالقسم الثاني بمجموعة القاهره والقناة قبل أن يتم نقله لمجموعة بحري بعد هبوط ايسترن كومباني الذي سينضم لمجموعة القاهره والقناة .